日軍喺旅順發動大屠殺 係為戰時受挫泄憤?

尋日就同史友們講到有一位內地嘅美妝網紅妄顧民族傷痛，喺旅順博物館門口身穿日式服裝大跳熱舞，隨即佢就受到全國上下嘅批評同指責。咁到底以前旅順呢個地方發生過咩事呢？阿史今次就同大家介紹下旅順大屠殺啦！

旅順大屠殺係一件發生喺1894年11月21日甲午戰爭期間嘅慘案，旅順位於遼東半島最南端，同威海衛隔海相望，所以亦都係當時北洋水師嘅軍事重地，有住「東亞第一堡壘」之稱。咁本來打仗有輸贏，點解日軍又要對旅順子民進行屠殺呢？據《清日戰爭》入面描述，當時旅順大屠順會發生係同日軍喺攻打旅順期間受挫有關。自清朝同日本交戰以嚟，日本國內就一直誇耀日軍所向披靡，清軍不堪一擊。

喺呢場戰爭入面，日軍就喺土城子戰鬥遭遇到挫折，結果就令到師團長山地元治惱羞成怒。結果喺日軍攻入旅順口果陣，佢就指揮第1師團伊瀬知好成聯隊長同埋河野通好聯隊長進行大屠殺，老幼婦女都成為佢哋嘅目標。據估計大屠殺期間，一共有20,000軍人平民死亡，呢件事就連英國《泰晤士報》、美國《紐約世界報》都有報導。