前晚就同史友們講到蘇炳添點樣創造近代黃種人嘅歷史，殺入奧運嘅百米決賽並且响晉級過程中跑出9.83秒嘅成績，意義唔可以講話唔大。其實，89年前，第一個參加奧運嘅中國人，亦正正係百米飛人，佢個名，叫做劉長春。

劉長春係中國短跑運動員，佢亦都有另一個稱號，就係「中國奧運第一人」。出生喺1909年嘅佢早年就喺東北大學就讀體育系，喺14屆華北運動會一舉打破100米、200米、400米三個短跑項目全國記錄，甚至仲喺100米跑出10.8秒嘅成績，當時就已經震驚全國。

本來劉長春應該有更好嘅發展，之不過喺1931年九一八事變爆發之後，當時偽滿就登報指劉長春將代表滿洲國參加1932年夏季奧林匹克運動會，之不過劉長春並冇屈服，出於民族氣節，佢喺《大公報》發表聲明：「本人為中華民族炎黃子孫，中國人絕不代表偽『滿洲國』出席第十屆奧林匹克運動會。

呢個舉動感動到張學良，佢出資8000銀圓並且通過私立南開大學校長、國立東北大學校董會董事、全國體育協進會董事張伯苓緊急電報畀奧運會組委會為劉長春報名。

結果，1932年7月，劉長春從上海市啟程乘威爾遜總統號郵船去美國加利福尼亞參加奧運會。足足21日嘅航程，劉長春到達當地並且成為首個參加奧運嘅中國人。响男子100米賽道上，無訓練場、暈船嚴重，狀態大打折扣嘅劉長春最終無緣決賽，但作為中國第一位參加奧運會比賽嘅運動員，他已經用10秒7嘅成績為中國速度按下咗啟動鍵。

相對於蘇炳添嘅9秒83，呢0.87秒嘅差距，見證住中國田徑從孑然一身到驚艷世界，跨越了足足89年。

原圖嚟自網絡