按照大家今時今日對奧運會嘅認知，都會將呢場世界各國嘅盛事理解成體育競賽，但唔講唔知其實奧運會原來係有藝術競賽，甚至藝術項目仲被列為比賽項目長達36年！到底奧運嘅藝術競賽係要比啲咩呢？阿史今次就同大家介紹下啦！

要介紹現代嘅奧運會就要由一個人講起，呢個人就係現代奧運會嘅發起人顧拜旦男爵。顧拜旦成長喺法國嘅一個貴族家庭，佢嘅爺爺同埋爸爸都係畫家，所以佢本人深受藝術影響，自幼亦都學習咗劍擊、賽艇同埋騎馬等等嘅貴族運動。咁佢點解又會同現代奧運會有關呢？原來當考古學家喺1875年開始發掘到古代奧運會嘅遺址果陣，顧拜旦就想重現返昔日奧運會嘅光彩，於是就喺1892年第一次提出「恢復奧林匹克運動會」，並且喺1896年4月6日至15日希臘雅典舉行第一屆現代夏季奧運。

而提到呢一點，原來古代嘅奧運會唔會單純比試體育運動，各個城邦都會有文化使者去到希臘展示文化藝術作品，於是第一任奧運會主席唔係由運動員擔任，而係由希臘詩人、語言學家澤麥・特里烏斯・維凱拉斯擔任。提出舉行奧運嘅顧拜旦希望可以將藝術作為競技項目加入到奧運會，所以喺1906年奧組委通過5項奧運藝術比賽項目：建築、文學、音樂、繪畫和雕塑，合稱「繆斯五項藝術比賽」作為比賽項目，但點知就因為參賽標準同埋人對藝術品鑒賞能力不一，而令到藝術比賽項目喺1908年倫敦奧運會、1912年斯德哥爾摩奧運會都受到好大影響，最終就喺1952年被取消喇！

原圖嚟自網絡