霍英東對國家隊健兒講心又講金

已故愛國商人霍英東生前對推動祖國體育發展以及香港體壇發展嘅貢獻，相信史友們多多少少都知道，睇返佢以往所做嘅事，佢對國家隊奧運金牌得主真係又講心又講金。

响1984年，中國國家隊第一次參加奧運會，霍英東舉家去咗洛杉機睇比賽，當屆國家隊拎到15面金牌，佢曾經講過當國歌高奏，國家五星紅旗冉冉升起個陣，感到無限自豪，無比光榮。之後佢就捐贈一億港元設立霍英東體育基金，基金每年收益全部用作發展體育。自此，霍英東都會頒發獎金俾每屆奧運會中取得金牌國家隊健兒。好似响1992年，國家隊拎到16面金牌，其後國家隊代表團訪港時，霍英東就頒贈金牌同奬金俾金牌健兒。响1996年，霍英東就去咗北京將115萬美元獎金頒發俾各金牌選手，仲送贈每人一枚一公斤重嘅純金金牌作留念。2000年奧運會之後霍英東頒發280萬美元獎金俾金牌健兒們，以作鼓勵。

據乒乓女王鄧亞萍憶述，佢話每一次奧運會霍英東都一定會獎勵有金牌運動員，甚至無獲獎牌嘅運動員只要係前8名佢都會俾你獎金。鄧亞萍仲透露，運動員拎幾多塊金牌，霍英東就送佢一樣數目嘅金牌，所以佢自己就前前後後收咗四塊金牌。