形容人想佔便宜但最後便宜冇佔到不但止，仲令到自己有所損失，呢種情況就有一句古語可以形容，呢句就係「賠了夫人又折兵」。要知道呢類古語背後一般都有故事嘅成份，咁到底喺歷史故事上，又係邊個人物「賠了夫人又折兵」咁慘呢？

答案就係東吳主將周瑜喇！喺「賠了夫人又折兵」呢句說話前面，其實仲有一句「周郎妙計安天下」，要解釋呢句句子，就要由赤壁之戰之後講起。公元208年，曹操赤壁大敗，江東孫權地盤進一步得到擴充，而劉備由原來無城可據守到坐擁荊州。當時三國鼎立，為咗可以延續呢個形勢，東吳就想向蜀漢拎返荊州，但要做到呢一點並唔容易。於是當時東吳主將周瑜就諗到一條計：假借要將孫權妹妹嫁畀劉備，等劉備嚟到東吳之後就將佢當成人質，咁就可以要求拎返荊州喇！

周瑜嘅計策當然巧妙，但蜀漢背後嘅人物正係諸葛亮，諸葛亮深知周瑜計謀，於是就幫助劉備去到東吳娶親之後再返到成都，就算周瑜帶兵追趕但最後都被伏兵打敗。由於呢個情況東吳既送出咗孫權妹妹，途中又有士兵傷亡，所以後世就稱之為「周郎妙計安天下，賠了夫人又折兵」喇！

原圖嚟自網絡