一江山島戰役 解放軍首次海陸空聯合作戰

最近台海局勢好似有啲緊張，內地官媒都不時就台海局勢放話。可能因為咁，最近網上就出現咗唔少討論五十年代有關台海戰役嘅文章，其中就包括一江山島戰役。

一江山島位於浙江省台州灣外，响國民黨軍隊撤退到台灣後，仍然擁有福建省同浙江省部分外島嘅控制，蔣介石一直想利用呢啲外島作跳板進行反攻，所以當時部分外島就有軍隊駐守，其中一個就係一江山島。响1955年1月18日，解放軍就對一江山島進行攻擊，經過兩小時戰鬥後，成功解放一江山島，呢場戰役就被稱為一江山島戰役。

呢場戰役特別之處，就係解放軍首次海、陸、空三軍聯合作戰，標志著解放軍現代化作戰樣式嘅發展同戰鬥力嘅提升，响中華人民共和國軍戰史上具有劃時代嘅意義。