龐貝古城發現迄今最完整人類遺骸

位於意大利嘅龐貝古城一向都係唔少考古迷關注嘅一個考古遺址，作為古羅馬都市之一嘅龐貝，因為一場火山爆發而被活埋喺火山灰之下，亦都係因為呢次突如其來嘅自然災害，令到城市入面唔少事物都得以保留。而近排就有考古團隊喺古城範圍內搵到迄今最完整人類遺骸！

據了解今次考古團隊就喺龐貝古城入面嘅一處墓地搵到一具人類遺骸，可以追溯到西元79年，亦即係龐貝城被火山灰摧毀之前嘅前十年。咁點解會用「迄今最完整嘅發現」嚟形容呢次發現呢？原來當時大多數死亡嘅成年人都係以火化方式處理屍體，所以要搵到仲有白髮、耳朵嘅遺骸真係唔容易！

通過墓碑銘文得知，呢具遺骸墓主叫做塞昆迪奧（Marcus Venerius Secundio）。佢喺60歲左右離世，原本係奴隸同埋龐貝維納斯神廟（Temple of Venus）守護者，但後來就成功擺脫奴隸身分，加入奧古斯都祭司學院（Augustales），得到唔錯嘅社經地位，呢次發現真係相當經典！