到八月尾，又差唔多到開學日子喇！「射擊女神」楊倩近日返到清華大學註冊，準備新學年開始，而更响日晷旁邊拎住奧運金牌影咗張相，網絡唔少報道即刻話「無體育，不清華」。

可能唔少人對清華大學嘅印象都係匯聚全國尖子學生嘅地方，即一班書呆子嘅學校。但其實從以前到今日，大部分清華學生都會被「強制運動」，呢個傳統係由一個人留落嚟，就係馬約翰教授。呢位响民國初年就入職清華嘅化學系老師，提倡學生要「健身與勵志相結合」，得到時任校長周詒春賞識，後嚟成為體育部主任。响唔少後嚟成為名人嘅清華學生回憶中，都有被馬約翰「折磨」嘅經歷。馬約翰之所以有咁嘅諗法，係因為馬約翰覺得國民形像代表住國家形像，國家強大自國民強健開始。

到咗新中國成立後，本身係清華學生嘅蔣南翔做校長，佢就堅持重視清華學生體育呢個方向，仲提出「至少為祖國健康地工作五十年」。就係咁，每一代清華學生都要修讀體育課，仲要過體能測試先可以當合格。阿史昔日夜遊清華校園個陣，就見唔少學生夜麻麻响操場跑步，果然「無體育、不清華」。