今時今日身份證已經成為大家日常生活不可或缺嘅證件之一，唔單止紀錄咗大家嘅個人訊息，甚至買賣車輛、樓宇、見工都需要用到，但史友們又有冇諗過，以前嘅身份證其實只係好簡單嘅一張紙？

近排歷史檔案館就舉行年度展覽「言歸『證』傳」，當中就以身份證作為主題，向大家展出超過七十年嘅館藏以及喺入境事務處借嚟嘅歷代身份證、製作身份證嘅用具等等。提到身份證，可能史友們都會有一個問題，就係點解冇啦啦要有呢種證件呢？

原來喺香港二戰前後，人口由戰前嘅160萬大幅減少到60萬，而去到1949年更有大批受戰爭影響嘅難民由廣東、上海以及其他城方走難嚟到香港，人口一時之間就上升到220萬，破咗歷來嘅紀錄。面對突如其來嘅轉變，香港身份證就喺1949年面世，最初就只係一張紙質證書，後來因應時代需要慢慢演變成過膠卡、甚至仲帶有晶片。

唔單止咁，呢次展覽仲有展出製作身分證嘅用具、上世紀60年代市民拍攝身分證相片同埋流動登記隊出勤果陣嘅珍貴歷史照片，如果史友們有興趣不妨可以去香港歷史檔案大樓參觀。

原圖嚟自網絡