埃及考古新發現4300萬年前有四腳鯨魚?

鯨魚唔係魚而係哺乳類動物，呢一點相信唔少史友都知道，之但係如果阿史同你講，鯨魚唔單止有海洋生物嘅特徵，甚至可能仲有四隻腳，唔知史友們又信唔信呢？

近排喺埃及又有新嘅考古發現，有考古團隊就喺埃及西部沙漠嘅法尤姆凹地（Fayum Depression）發現一具約4300萬年前鯨魚化石。本身喺沙漠地帶搵到鯨魚化石都已經夠晒出奇，而更加神奇嘅係呢具化石所屬嘅鯨魚竟然係兩棲四腳鯨魚，真係一次相當重大嘅考古發現！

據了解，呢次發現嘅鯨魚化石屬於「原鯨科」（Protocetidae），相信係一種喺演化過程中滅絕嘅鯨魚，而埃及西部沙漠曾經係海洋覆蓋嘅區域，所以先會有豐富鯨魚演化證據。而呢次發現嘅鯨魚，估計就身長三米，體重就有六百公斤，暫時以古埃及胡狼頭神阿努比斯命名為「阿努比斯原鯨」（Phiomicetus anubis）。