金沙遺址博物館推 豪華文創月餅禮盒

一年容易又中秋，提起呢個節日亦都意味住「食月餅」嘅日子即將到來。每年唔少商家都會推出各種新式嘅月餅，而今年就連博物館都唔放過呢個機會，竟然推出埋豪華文創禮盒！

阿史所講嘅呢款文創月餅禮盒，其實就係金沙遺址博物館為慶祝金沙遺址發現20周年而專門推出嘅。咁到底呢個禮盒嘅月餅又同金沙遺址有咩關係呢？原來禮盒入面嘅月餅圖案都係金沙遺址出土具有代表性嘅文物圖案，就好似有蛙形金箔、寓意翱翔天際嘅銅鳥、太陽神鳥金飾同埋黃金面具等六樣鎮館之寶，將三千幾年前嘅古蜀先民手工技藝放到月餅之上。

如果以為月餅上嘅圖案只係就咁印上去，大家可能諗得太簡單喇！事關呢啲金箔係應用咗「南京金箔鍛製技藝」，專用鍛製食品裝飾金箔設計，真係誠意十足。而為咗令成個文創禮盒同博物館更加相關，月餅禮盒仲附送埋一個月球考古套裝，等顧客可以邊食月餅邊考古，真係一次滿足兩個願望！