喺漢末三國時期，喺劉備治下嘅荊州本身係由關羽駐守，但點知關羽主動進攻樊城，令到曹操派出多名將領役攻，及後仲引嚟孫權由背後偷襲荊州，關羽兵敗麥城最後更加被孫權斬首。呢件事後世就形容佢係「大意失荊州」，而喺1800年後，關羽再次因為荊州而被斬首！

話說早幾年荊州古城就落成咗一座耗資1.7億人民幣、號稱係全中國最大嘅關公像，呢座關公像喺2014年動工並且喺2016年開始試營運。之不過，其實關公像嘅項目一直未獲審批，連消防驗收都未通過，所以其實係屬於違法建設。而喺2020年，住建部通報就正式責令整改，關公像就需要進行遷離，預計成個工程需要1.55億人民幣。

得知呢個消息後，唔少國內網民都幽默地發表言論，例如就有「關老爺到底受什麼罪啊」、「當年關羽大意失荊州，如今荊州大意失關羽」，更加有熟讀三國史嘅網友直言「1800年前，關羽曾大意失荊州，頭被砍下送給曹操，而今頭又被砍一次，2次都是因為荊州。」

原圖嚟自網絡