近排內地網絡上就流傳一則影片，影片中就係浙江一位小學校長喺開學禮當日站立喺學校門口，凡係見到有學生經過佢都會雙手行「作揖」禮迎接學生，而學生又會禮貌咁「作揖」回禮，成個畫面相當彬彬有禮。而據媒體報導，校長喺學校門前「作揖」並唔係一朝一夕嘅事，而係堅持咗13年，真係唔簡單啊！

唔少網友睇到影片之後，都表示呢種傳統應該要繼續傳承落去，咁阿史今次就為大家介紹下啦！呢種傳統嘅禮儀起源於周朝，亦即係傳統嘅揖禮，如果要認真細分，就有長揖、天揖、時揖、土揖等動作，但一般做法上就係將左右手食指、中指、無名指、尾指四指併攏，一隻手掌撫托另一隻掌背平疊，掌心朝內，兩隻手拇指相扣，拱手為禮。

咁呢種禮儀手勢又係幾時先要做呢？原來無論係喺親友見面、節日慶典、武者對決、甚至喪禮都會用到，史友們又學識未呢？

原圖嚟自網絡