汪順金牌總數13面 登頂全運多金王

呢幾日阿史都同史友們介紹咗幾位全運會嘅傳奇人物，而就喺日前又有一位全運多金王誕生，佢就係東京奧運會冠軍、浙江隊游泳選手汪順。

提起我國嘅游泳運動員，可能唔少史友會即時諗起孫揚，但阿史就認為未來大家都應該要記住汪順呢個名，事關佢嘅表現真係可以堪稱係我國泳壇嘅未來。汪順出生喺1994年，佢以6歲之齡開始練習游泳並且喺13歲就成功進入省隊。時間去到2010年，佢就第一次代表國家隊參加廣州亞運會、2011年就參加上海游泳世錦賽、2012年仲代表中國參加英國倫敦奧運會游泳比賽男子200公尺混合式賽事。

雖然早年嘅佢並冇得到太多獎牌，但努力同埋天份始終都唔會被埋沒，去到2016年巴西裡約熱內盧奧運會，佢就獲得裡約奧運會200公尺個人混合式銅牌，並且喺早排嘅東京奧運以1分55秒打破亞洲紀錄，奪得男子200公尺個人混合式決賽金牌，係歷史上第一個拎到呢個項目冠軍嘅亞洲運動員，亦都係繼孫揚之後第二位拎到奧運金牌嘅男子游泳運動員。