早排阿史就同史友們介紹到有外國嘅市民喺潛水嘅時候發現到羅馬帝國嘅金幣，說時遲那時快，喺以色列近排亦都有位市民喺港口城市潛水嘅時候搵到一樣意想不到嘅文物。
事源就係呢位叫做卡津（Shlomi Katzin）嘅市民喺上星期六潛水果陣就喺海底搵到一把大約1.3米長嘅古鐵劍，劍身之上係生滿海洋生物，但整體嚟講就保存得相當完整。發現古劍嘅佢就決心將呢件文物交畀文物局，而經過專家鑑定同埋處理之後，就推測呢件文物距今大約有九百年歷史，係十字軍東征果陣一個騎士嘅配劍，喺完整修復同清理之後就會進行展出。
咁到底點解呢把劍係喺海底被發現呢？專家就估計發現古劍嘅地方係一個天然海灣，以往就曾經用作避風港之用，所以歷代都會有唔少商船停泊，因此就有唔少文物沉落海底流傳到今時今日喇！路不拾遺嘅卡津其後仲獲得良好公民證書，真係皆大歡喜啊！
原圖嚟自網絡