以往阿史都同史友們介紹唔少世界各地嘅珍貴寶物，近排阿史就喺網絡上見到有網友提起英女王皇冠巨鑽「光之山」，咁到底呢粒巨鑽係咩來頭，點解印度文化部多次會呼籲英國歸還呢粒寶石呢？今次阿史就同大家講一講啦！
「光之山」，曾經係世界上最大嘅一粒鑽石，呢粒鑽石出產自印度安德拉邦，伙當時世界上唯一一個鑽石出產地。喺呢粒鑽石出土之後，當時卡卡提亞王朝國王就將佢放喺首都瓦朗加爾嘅一間廟內一個女神眼中。之不過後來經歷戰亂，呢粒鑽石就先係落入莫臥兒帝國巴卑爾手中、阿夫沙爾王朝開國君主納迪爾沙、阿富汗國父艾哈邁德沙·杜蘭尼等人手中。
後來鑽石去到錫克帝國蘭季德·辛格手中嘅1839年，佢死前就立下遺囑要將「光之山」放到賈格納寺，但英國東印度公司就冇跟從呢個指示，反而喺1849年以拉合爾條約將鑽石據為己有，仲要蘭季德·辛格個仔親自送到維多利亞女王手中。
「光之山」經過一輪展出之後，呢粒本身有186卡鑽石重新切割切成約108卡以增加光彩度，現時就喺伊麗莎白王后冠之上。雖然印度方面多次都打算拎返呢粒鑽石，但前英國首相卡梅倫David Cameron就表示如果開咗先例，咁大英博物館將會乜都冇晒咁話。