瀆山大玉海點解會失去玉色？

繼續同史友們介紹我國嘅珍貴文物，玉器大家可能都睇過唔少，而要被稱為鎮國玉器之首，除咗造功要巧奪天工之外，玉石本身嘅成色同埋質地都係相當講究。但以下阿史要介紹嘅呢件九大鎮國文物之一嘅瀆山大玉海，就咁睇外表大家可能唔會知道佢有咁犀利嘅過去。

瀆山大玉海依家就放咗喺北海公園承光殿當中，就咁聽個名可能唔少史友都會知呢件係一件相當龐大嘅玉器。瀆山大玉海唔單止得個「大」，佢仲係我國現存最早、最大嘅巨型玉雕。而估唔到嘅一點係，呢件玉器最初並無好順利咁傳世，反而係被當做醃鹹菜嘅「石瓮」，最後係由乾隆慧眼識「玉」。

據《元史》記載，喺公元1265年，元世祖忽必烈就擴建北海瓊華島並修建廣寒殿，為咗呢個地方有多更裝飾，佢就命人以河南獨山玉雕刻一件裝酒嘅玉翁，史料記載呢個「大玉海」可以「貯酒三十石」。之不過，隨住元朝覆亡，大玉海就連同廣寒殿一齊毀於火災之中，瀆山大玉海被完全熏黑、開裂，其後就被北京嘅道士拎去醃鹹菜。