繼續同史友們介紹世界各地嘅考古發現，「失落的黃金島」嘅傳說唔知史友們有冇聽過，但近年嚟種種嘅證據同埋發現都表示，呢個被稱為「黃金島」嘅三佛齊遺址可能唔再失落。
喺近5年嚟，唔少印尼蘇門答臘島漁民喺進行漁業同埋潛水期間，就喺巨港市（Palembang）穆西河搵到唔少寶石、黃金首飾、硬幣同埋鑲滿寶石嘅真人大小佛像，全部寶物都價值不菲，呢啲發現就引起唔少考古學家注意。據考古學家分析呢啲寶藏嘅外觀同埋位置之後，就推斷呢啲寶物可以追溯到8世紀嘅時候，連帶喺河床發現嘅其他古代中國硬幣同埋瓷器，極有可能就係出自7世紀至13世紀間嘅「三佛齊帝國」（Srivijaya）。
「三佛齊帝國」以往就一直被認為係一個傳說中嘅王國、失落嘅黃金島、國際十字路口，當時世上幾乎所有貨物都要經過呢個地方，咁到底呢個統治住印尼同埋東南亞接近六百年嘅國家有幾咁繁榮，又因為咩事而神秘消失？咁就需要搵到個帝國遺址先有可能知喇！

原圖嚟自網絡