「探花」除咗要有才華 原來仲有另一個要求？

喺古代讀書人最大嘅成就正係憑住自己嘅多年苦讀參加科舉考試，喺朝中得到一官半職。可能大家都會諗，一定係考到「狀元」先至最開心，但其實考到「探花」心情都會唔錯，事關要做「探花」除咗才華之外仲有其他條件！

古代嘅科舉考試基本嚟講就分成三個階段，分別係鄉試、會試同埋殿試，而喺殿試仲會由皇帝親自把關，選出當中前三甲，亦即係狀元、榜眼同埋探花。咁既然係頭三甲，狀元自然就係才華最出眾果位，但原來要做探花都唔容易，因為唔單止要有才華咁簡單，仲要有出眾嘅外貌。所以，探花好多時候都係一個古代美男子，雖然才華係比唔上狀元，但可能因為外貌而得到更好嘅官運。

咁可能史友們都有個問題，就係點解探花會同外貌扯上關係呢？原來喺唐朝嘅時候，喺開榜之時正值春天，為咗祝賀考生可以拎到好成績，唔少宴會當中都會有一個環節名為「折花送狀元」，喺現場就會選出兩個美男子進士作為「探花郎」，將鲜花摘取送畀對方。所以，如果係大家都公認嘅美男子，就係被稱為「探花」，而去到南宋年間科舉第三名亦都正式被稱為「探花」，而講到明探花人選都係靚仔，就係去到明清年間嘅事喇！