今日係萬聖節，唔知史友們會唔會出去玩下「過下節」，不過响香港萬聖節都只係約朋友出去玩嘅藉口，同埋一年一度扮鬼扮馬嘅日子。

講到萬聖節，就一定唔少得到南瓜燈籠，記得細個睇過套戲，話响電視前戴南瓜燈籠頭套就會無命，呢個童年陰影到今日都有。咁史友們又知唔知，萬聖節同南瓜燈籠有乜關係呢？南瓜燈籠英文係Jack-o'-lantern，相傳係源於愛爾蘭一個傳說，有一個叫Jack嘅守財奴，因為天堂又唔收佢，地獄又唔俾佢入，被死神懲罰拎住燈籠遊走天堂同地獄之間，呢個燈籠就係Jack-o'-lantern。

最初愛爾蘭人係用薯仔同大頭菜做成Jack-o'-lantern（燈籠）。後嚟隨著唔少愛爾蘭人移居去美國，响美國發現用南瓜做燈籠仲好過薯仔同大頭菜，於是Jack-o'-lantern就成為今時今日嘅南瓜燈籠喇！