嘩嘩嘩，估唔到藝術館竟然會有咁多文物睇，就連「咸豐龍袍」都出動埋？相信唔少史友睇到都會覺得心動，就等阿史同大家介紹下啦！

由今個星期五起，香港藝術館就將會行舉行「#物色──館藏文物的色彩美學」展覽。顧名思義呢個展覽就係以顏色作為主題，將會展出三百幾件精選嘅中國藏品。要知道中國古代將顏色主要分為青、赤、黃、白、黑「五正色」，而呢次展覽就會以五個歷史人物分別係秦始皇、宋徽宗、明代永樂帝、清代乾隆帝、大臣郎廷極作為五個顏色嘅代表，並且介紹佢哋點樣影響到當代器物嘅色彩，展品種類由陶瓷、漆器、絲織品、玻璃、玉器等都有，真係相當豐富！

而提到呢次展覽嘅重點展品，除咗有清代點翠嵌寶石珍珠蝠蝶花卉鈿子、清代康熙時期郎窰紅釉觀音尊之外，重中之重嘅就有清代咸豐時期黃地刺繡十二章紋龍袍，有興趣嘅史友真係要去睇一睇啊！

原圖嚟自網絡