「達之路」紀念「糖薑大王」余達之？

以前仲讀緊書嘅時候，阿史返學嘅途中都必定會經過「達之路」同埋「又一村」，當時都冇乜為意呢兩個地方，但後來先至知道「達之路」、「又一村」都同一個人有關，佢就係「糖薑大王」余達之。

余達之係一位香港已故商人，出生喺1894年4月嘅余達之原藉廣東惠陽，喺香港出世嘅佢就讀皇仁書院，後來就去到馬來西亞發展，直到1926年先至返到香港出任江利士洋行董事會主席。而真正令佢成名嘅並唔單止咁，佢喺1937年全球經濟衰退之時，佢就喺南洋引入當地有名嘅糖薑，並且接辦濟隆糖薑公司，採用聯營制度。佢呢個舉動成功令到糖薑業喺香港得以發展，亦都令佢被稱為「糖薑大王」。

要知道早年以華人命名嘅街道真係唔多，咁余達之又做過啲乜令到有條「達之路」出現呢？早喺1940年代，余達之開始出任港九重要商會嘅職務，任內佢多次帶領港商去到英國、美國參加工展會，令到香港工業可以走向國際；而且喺香港工業發展方面，佢亦推動咗觀塘工業區同埋「又一村」項目，令到唔少就業問題、社區發展問題都得以解決。為咗表揚佢嘅成就，政府就將九龍塘一條主要街道命名為「達之路」，真係講開有段故啊！