龐貝古城近排有唔少新嘅考古發現，繼幾十年之後再次發現遺骸之後，龐貝古城近日就出土咗一間位於郊區嘅、完好無缺嘅「奴隸房」。到底早年嘅奴隸房有幾大，入面又有啲咩設施呢？阿史今次就帶大家睇一睇啦！
據考古學家公布嘅消息，呢間咁罕見嘅「奴隸房」係喺朱利安那城（Civita Giuliana）發現。叫得做「奴隸房」就當然唔好大，整體嚟講就只係得16平方公尺，成間房唯一光源就係喺房間上方嘅小窗戶。內部整體嚟講就係冇任何裝飾，房內就只係得3張用木頭加繩子架成嘅床，估計就係一家三口嘅住所，而床下方就有一個夜壺以及大雙耳罐，基本上都冇乜財產可言。
咁問題嚟喇，到底呢間房間嘅人係從事咩工作嘅呢？據考古學家分析，呢間房嘅居民房間內就有金屬同埋織物，連同附近搵到嘅戰車以及馬嘅遺骸，考古學家就推斷佢哋係負責製造同埋保養戰車，真係有趣嘅發現啊！
原圖嚟自網絡