提起安迪・華荷（Andy Warhol）呢個名，相信唔少對藝術有認識嘅史友都知道佢係pop art嘅開創者之一，而佢唔少作品都成功令到藝術商業化，最著名嘅一件作品就係金寶湯圖案。雖然呢位傳奇人物已經離世，但佢嘅作品嚟到今時今日都仍然開創咗唔少先河，就好似近日呢一件咁。
近日美國就有藝術團隊為咗可以令公眾更加關注藝術品本身，就利用咗安迪・華荷（Andy Warhol）喺1954年速寫而成嘅作品《仙女》（Fairies）真跡進行一件破天荒嘅事：藝術團體MSCHF將呢幅真跡放入「贗品博物館」（Museum of Forgeries）嘅項目，並且混合1,000幅睇落好似一模一樣嘅作品，以每幅250美元美金賣出。喺咁多作品之中，只有一幅真跡係價值2萬美金，之不過買咗呢批畫作嘅人可能永遠都唔知道自己果幅係咪真跡，就算係專家都好難分辨到。
呢個藝術團隊就表示，由於大部份藝術收藏者只關心藝術品會唔會升值，但就忽視咗作品本身嘅藝術價值，所以就有呢個舉動。至於點解會用安迪・華荷（Andy Warhol）作品，佢哋就認為呢個舉動同佢生前主張批量生產藝術商品理念相關，唔少史友們又點睇呢？
原圖嚟自網絡