江郎才盡呢句成語相信史友都一定聽過，對於從事創作嘅人而言最怕就俾人用呢句成言嚟形容。咁史友們又知唔知點解江郎會才盡，以及背後嘅原因呢？

江郎係指南北朝時期一名叫江淹嘅官員，江淹歷仕宋、齊、梁三代，官至相國右長史，可以話係當時嘅風雲人物。佢係一位大官同時亦係一位文學家，年少時已以作「賦」廣為人知。不過佢晚年嘅作品就被人話水平不如年輕時期嘅佢，响《南史·江淹傳》就有咁嘅記載：「淹少以文章顯，晚節才思微退。」至於原因就係：「又嘗宿於冶亭，夢一丈夫自稱郭璞，謂淹曰：『吾有筆在卿處多年，可以見還。』淹乃探懷中得五色筆一以授之。爾後為詩絕無美句，時人謂之才盡。」大概話佢响夢中將郭璞借佢多時嘅五色筆物歸原主後，佢就再無美句佳作，江郎才盡之說就係咁嚟喇！

對於江淹點解會才盡，後世就有好多唔同講法，好似話佢官位愈嚟愈高，富貴咗又忙咗所以無咁多閒情去寫文作賦。亦有人認為江淹晚年才盡，可能只係假扮出嚟。因為佢隨著官位愈嚟愈高，一言一行就更為謹慎，特別係梁武帝蕭衍略有文采但又氣量狹窄，所以江淹先至會藏拙，無展露自己真正才華。