喺十九世紀中期鴉片戰爭之後，由於清政府被逼簽落唔少不平等條約，大量嘅對外賠款令到國庫空虛，清政府對唔少平民就展開一系列嘅加稅，最終就令到唔少平民離開自己嘅故土，去到外國發展謀生。其中一個當時華人主要去嘅地方就係美國，單係喺1852年就已經有2萬個中國人去到當地搵工。之不過，因為美國嘅經濟問題，再加上當時中國人嘅工作表現出色，亦都引發美國人嘅反華情緒，唔少悲劇亦都隨之發生，其中一件就係「石泉城大屠殺」。

石泉城大屠殺發生喺1885年9月嘅美國懷俄明領地甘霖縣石泉城，由於當時《排華法案》禁止十年間中國人移民至美國，但喺呢條法案之前就已經有唔少中國人喺美國西部生活同工作，懷俄明境內唔少中國術民都係從事鐵路建築工作、開採媒礦，係當地重要嘅勞動力。之不過，由於當時移民人數增加，唔少白人都冇工開，反華情緒相當高漲。

當時煤礦公司希望喺冬天嚟到之前增加產量，於是一班白人礦工就提出加薪同改善待遇，但資方就唔肯接受，白人礦工於是就發起罷工，當中包括來自愛爾蘭、蘇格蘭及瑞典等地嘅礦工。

之不過，當時華人礦工就無加入罷工，煤礦公司喺班白人礦工罷工嘅時候，請咗百幾名華人礦工返嚟頂晒佢哋個位，結果就搞到啲白人礦工不滿。

案發當日，有白人礦工先同華人發生打鬥，後來有白人居然召集成班人馬帶埋槍包圍唐人街，燒殺搶掠，導致多嘅華人傷亡。暴亂結束時，至少有28名華人礦工死亡，另有15名華人礦工受傷，但呢件事發生後，當地輿論報紙輿論竟然贊同暴動結果，真係無恥到一個點！

原圖蹳自網絡