尋日中共六中全會閉幕，最矚目就係會上通過咗《中共中央關於黨的百年奮鬥重大成就和歷史經驗的決議》，呢份亦係中國共產黨第三個《歷史決議》。

第一個《歷史決議》係1945年中共六屆七中全會通過嘅《關於若干歷史問題的決議》，決議總結咗中國共產黨建黨以嚟特別係六屆四中全會至遵義會議前一段中國共產黨嘅歷史同經驗教訓，對若干重大歷史問題作出咗結論，並對中共建黨以來左傾同右傾錯誤作出批判，呢份決議被視為係延安整風運動嘅重要成果。

第二個《歷史決議》係1981年中共十一屆六中全會通過嘅《關於建國以來黨的若干歷史問題的決議》，決議回顧咗中華人民共和國成立以前中國共產黨嘅歷史，總結咗新中國成立以後社會主義革命同建設嘅歷史經驗，對中華人民共和國成立以來主要歷史事件包括反右、大躍進、文化大革命作出官方總結。