繼續同史友們介紹我國嘅一啲珍貴文物，提起同佛教相當嘅珍貴文物，以下阿史要介紹供奉住佛祖釋加牟尼佛指舍利一個影骨嘅唐八重寶函，絕對係當中嘅數一數二嘅重要文物，甚至仲被列禁止出境展覽文物。咁到底呢件現存於法門寺博物館嘅文物有幾犀利呢？阿史今次就同大家介紹下啦！
佛骨舍利先後有高宗、武后、中宗、肅宗、德宗、憲宗、懿宗和僖宗八位皇帝六迎二送供養佛指舍利，最後喺僖宗乾符二年（875年）被封入法門寺地宮結壇供養，八重寶函亦都喺呢次迎奉當中。之不過去到1981年，喺明代曾經重修嘅法門寺就坍塌咗一部份，喺1986年當地政府決定撥款重建，先至喺清理地基果陣搵到指骨舍利四枚以及八重寶函。
咁到底八重寶函到底係點樣？八重寶函真係足足有八層，最外層係檀香木寶函，其後嘅七層就係鎏金四天王盝頂銀寶函、素麵盝頂銀寶函、鎏金如來說法盝頂銀寶函、六臂觀音純金盝頂寶函、金筐寶鈿珍珠裝純金寶函、金筐寶鈿珍珠裝武夫石寶函以及最內層嘅寶珠頂單檐四門純金塔，而當中就係放置住佛指舍利，真係舉世珍品啊！
原圖嚟自網絡