三星堆一直都出土唔少「神器」，繼好多年之前震驚中外嘅青銅神樹、早排嘅黃金面具等等，近日呢個神秘嘅遺址又再次有新嘅考古發現喇！

近排考古人員就喺三星堆祭祀區發現到一件龍形器，就咁聽可能唔少史友都會覺得呢件文物就係一條龍，之不過奇就奇在，呢條軀體向上揚嘅龍，頭部竟然係一個老虎頭！據了解呢件文物現時位於三星堆嘅8號坑，暫時可見就有一個三角形嘅青銅底座以及青銅小鳥，呢兩點曾經令考古學者以為又再有青銅神樹出土。之不過隨住考古發掘嘅進行，呢件龍形青銅像亦都露出真面目喇！

目前已知呢件高約80公分嘅文物就係「虎頭龍身」，但考古團隊認為呢個並唔係器物嘅全部，應該仲會有更大嘅器物基座同埋底部，龍身更加有可能會倚靠喺其他物體上。到底最終呢件文物會係點樣呢？阿史真係相當期待啊！

原圖嚟自網絡