提起消炎止血、活血化淤嘅「神藥」，雲南白藥絕對係當中「國寶級」嘅存在，呢味藥唔單止喺中國被廣泛使用，甚至去到外國都一樣聞名。但唔講史友們可能未必知，雲南白藥創始人其實有一段相當悲劇嘅經歷。

一直被列為國家保密配方嘅雲南白藥，係喺1902年之時由雲南江川名醫曲煥章根據師傅姚連鈞真傳，以彝族民間用藥為基礎而創造出嚟嘅消炎止血、活血化淤嘅白色粉末，最初係叫做「曲煥章百寶丹」。

「曲煥章百寶丹」真正聞名之時係喺戰時，當時呢隻藥止血、消炎效果出奇咁好，所以亦都成為當時軍備藥品，就喺台兒莊戰役，曲煥章就係滇軍每人都提供一份並且畀上說明書，當時受咗重傷嘅士兵都因為呢隻藥而得救。由於「曲煥章百寶丹」喺戰場上有咁嘅奇效，當時國民政府就以抗戰為名，要求曲煥章勸捐，而曲煥章亦都好快咁認捐咗一架標價三萬滇幣嘅飛機。

之不過，咁正正就係悲劇嘅開始。由於當時國幣、滇幣價值差距十幾倍，國民政府就將標價由三萬滇幣換成三萬國幣，一時之間曲煥章拎唔出三十萬。結果就被關押起嚟。期間，時任國民黨中央委員焦易堂以中央國醫館館長名義邀請佢到重慶國醫館任職，但真正目的就係要雲南白藥秘方。曲煥章拒絕咗呢個要求，最終就喺1938年8月患上痢疾去世。

喺解放之後，曲煥章妻子繆蘭英就將配方交畀國家，並且改名為「雲南白藥」。

原圖嚟自網絡