尋日講過日本响上個世紀喺各個佔領地區進行日本化嘅殖民管治，後嚟更進一步實行所謂「皇民化」運動，當時除咗寶島台灣外，朝鮮半島亦係其中一個被「皇民化」嘅地區。
响1905年，朝鮮李氏王朝即大韓帝國被迫同日本簽咗《乙巳保護條約》，日本通過呢條不平等條約令朝鮮成為佢哋嘅「保護國」，之後日本更响1910年吞併咗朝鮮，自此日本就响朝鮮半島實行殖民管治。不過，即使面對當時國力較強嘅日本，韓國人嘅反日情緒一直高漲，仲曾經爆發過「三一運動」等嘅起事，可惜以失敗告終。後嚟日本就以「皇民化」方式培育親日份子，亦從文化、生活習慣、信仰等方面對朝鮮人進行「改造」，呢個手法就同對台灣民眾實施「皇民化」手法相似。到咗三十年代，日本加快對亞洲各國進行入侵，對韓國人嘅「皇民化」推至高峰，包括要佢哋改日本姓，禁朝鮮人學韓語，仲有徵召朝鮮男性從軍。
之但係，韓國人民族意識比較強，所以二戰結束後，新嘅政府就清算「韓奸」。但另一方面，唔少韓國人被日本殖民管治多年，一時對自己身份有啲尷尬，好似已故韓國總統朴正熙，就係曾經幫日本人作戰嘅韓國人。
原圖嚟自網絡