繼續同史友們介紹我國嘅一啲考古成果，近日喺湖北省博物館三期新館就舉行咗一個名為「楚國八百年」嘅展覽，當中就展出咗接近五百件文物，分別係嚟自湖北九連墩、望山、包山、熊家冢等楚墓，係一次相當完整同埋最新嘅成果研究，今次阿史就帶大家睇一睇！
要知道楚國其實係周代相當重要嘅一個諸侯國，當時嘅楚國其實係高度發達並且有獨特嘅地域文化，所以喺今次展覽當中，就展出咗一系列有楚文化性質嘅文物，就好似喺宜昌西周遺址出土嘅中晚期陶器、青銅鼎、青銅編鐘及銘文，係楚國極罕有嘅早期歷史資料；同時包山楚墓出土嘅「楚先老僮、祝融、鬻熊」簡文亦都有喺呢次展覽展出，呢啲簡文都令到楚國在西周早期立國更加確切。
而同場亦都有吳王夫差矛、吳王夫差劍、陶水井圈、筒板瓦、排水管等文物，都見證住楚國強大嘅發展。而講到成個展覽焦點文物之一，就當然係湖北荊門包山2號楚墓出土彩繪漆奩圖像，亦即係完整嘅車馬出行圖。當中就繪畫咗26人、4乘馬車、10匹馬、9只鳥等，通過5棵柳樹分隔成互有關聯的畫面，係現存最早「連環畫」之一，如果有機會，阿史都想親眼望一望！
原圖嚟自網絡