「人心不足蛇吞象」 真係有蛇可以吞到象？

喺形容人起咗貪念而做出唔少貪得無厭嘅行為而自招惡果，好多時候我哋都會用到「人心不足蛇吞象」嚟形容，之不過呢句說話嘅出現到底又係咪因為真係有蛇可以吞到象先有呢？阿史今次就同大家講一講啦！

其實現實就當然唔係有咁犀利嘅蛇啦，呢句說話嘅起源其實係借用咗《山海經·海內南經》當中嘅「蛇吞象」，亦即係「巴蛇食象，三歲而出其骨。君子服之，無心腹之疾」，當中就描述到巴蛇生於南海，青頭黑身，可以吞食大象，消化三年然後將象骨頭吐，就可以用於治療人體的心腹疾病。

之不過，就咁睇《山海經》似乎就未必明白到「蛇吞象」同埋「人心不足」嘅關係，所以又有個故事可以講一講。相傳古時有個人好窮，但佢曾經救過一條蛇命。蛇經過修練之後就決定報答救命之因，滿足呢個人嘅願望，起初呢個人只求溫飽，後來就想做官，甚至變本加厲想做埋宰相、皇帝。蛇後來覺得呢個人貪得無厭，決定一口食咗呢個宰相，所以最初就有「人心不足蛇吞相」呢句說話，後來就演變成「人心不足蛇吞象」。