三星堆發現 「青銅龍虎神獸」

今年係虎年，當然就要應下節同史友們介紹下我國嘅一啲「虎」類文物，早排就同史友們講咗上海博物館嘅特展，今次就同大家介紹下三星堆嘅新發現啦！

近排三星堆遺址又再次有新出土嘅文物，除咗有亮相春晚嘅青銅大面具之外，仲有一隻「青銅龍虎神獸」。據了解呢隻虎頭青銅像係出土自「祭祀坑」，銅像上嘅頭部係擁有雙角，而身體就係金底虎斑紋獸身，由於成件文物嘅形象都係前所未見，所以考古團隊只可以暫時用「虎頭龍身青銅像」嚟命名。

由細節睇落去，成件文物嘅前肢係立咗喺一個三角青銅支架上，後身就同另一件青銅器物焊埋一齊，而嘴部更係含有一個帶刃嘅青銅器。而繼續睇落去，器物前段仲有一隻鳥，表面嘅陰線上係填有硃砂，亦即係原本係帶有顏色。目前為止呢尊青銅像仍然喺發掘階段，但單單係呢幾項細節就已經令考古團隊相信，清理完成之後呢尊銅像會係相當華麗，可能又係一件國寶級嘅文物！