喺今時今日形容人同人之間嘅親密關係，可能大家都會用到「老友」、「閨密」呢啲詞，之但係喺古代又係點樣形容呢？原來有一種關係，係用「拜」嘅次數嚟表示架喎，阿史今次就同大家講一講啦！

所謂嘅「八拜之交」，後世可能係理解做管鮑之交、知音之交、刎頸之交、捨命之交等八種交情，但其實呢個詞最先係出自邵伯温《聞見前錄》。喺中國嘅宋代就有一個咁樣嘅故事，當時北宋政治家韓琦喺大名府做官果陣，有個叫做李稷嘅人就負責做轉運糧食，但佢喺韓琦面前就表現得相當傲慢，但韓琦並冇同佢計較，反而對佢好友好。

而後來當韓琦離任，就由另一位政治家文彥博頂上。文彥博得知呢個情況，喺未上任之前就已經放話表示，李稷父親李絢以前係佢學生，而李稷之所以咁無禮，一定係因為父親早死冇人管教，所以等佢將李稷當成係仔管教，睇佢仲會唔會不知悔改。

而當文彥博去到大名府果陣，李稷前去拜見，但文彥博仲專登要佢喺客廳等上一段時間。而等時候差唔多，佢一見到李稷就直接表示，你父親係我朋友，你就直接對我拜八次啦。李稷見到咁嘅情況，亦都冇再辯駁，就直接如數拜咗八次，後來就將「八拜之交」呢個詞用作表示古代世交子弟謁見長輩嘅禮節喇！

原圖嚟自網絡