尋日就係中國嘅傳統節日元宵節，喺傳統上嚟講呢一日大家都會賞月、祭月，但喺尋日開始大家又多一樣嘢做，就係可以欣賞到三星堆青銅大面具，事關呢個面具第一次正式展出！

其實喺春晚果陣，呢個傳奇嘅展品就已經喺聯歡晚會上露過相，令到唔少觀眾都相當期待佢嘅展出。終於，喺三星堆博物館文物保護與修復館完成修復保護之後，呢個面具就喺元宵節展覽當中展出，亦都公布咗唔少細節畀大家了解。

據館方公布，呢個面具寬131cm、高71cm、深66cm，重131斤，係三星堆目前出土形制最完整、體量最大，而且更加係保存最完好嘅大型青銅面具。相信唔少史友心目中都有個疑問，就係點解要整咁大個面具呢？好明顯係冇實用性架喎！亦都係因為呢一點，其實考古團隊亦都推斷面具以往係放喺神廟中供人膜拜嘅神器。

而研究人員亦都進一步對面具嘅的鑄造工藝進行分析研究，出奇地就喺面具嘅右眼眉、右眼球、右眼角發現到有絲綢紡織殘留物；而經過分析之後，就發現由面部、臉頰後部、眼睛、耳朵等多部位都係分部鑄造再焊接組合而成，呢種技術同藝術完美結合，亦都象徵住古蜀人精神世界嘅獨特表達，真係令人為之驚嘆啊！

原圖嚟自網絡