韭菜盒子紅糖餅 因谷愛凌熱爆網絡

國家隊選手谷愛凌再奪一面金牌！呢位滑雪公主响北京冬奧會自由式滑雪女子U型場地技巧決賽贏得佢今屆冬奧個人第二面金牌，亦係國家隊响今屆賽事嘅第8金。谷愛凌今屆除咗表現出色外，更因為佢而令一啲中國民間食品熱爆網絡，當中就有韭菜盒子同紅糖餅。

响早幾日嘅賽事裡面，谷愛凌响比賽後等緊成績個陣就拎起韭菜盒子，呢個充滿個性嘅畫面令韭菜盒子出晒名。韭菜盒子係中國北方一個民間非常流行嘅傳統小吃，以韭菜、雞蛋為餡料，表皮金黄酥脆，餡心韭香脆嫩。而响唔同地方韭菜盒子嘅外形同餡料都唔一樣，不過製法基本一致。另外，谷愛凌响U型場地技巧決賽前話，早兩日食咗紅糖餅。紅糖餅係一款老北京傳統小食，老北京糖餅同普遍煎餅做法差唔多，不過餡料就係紅糖。聽啲老北京講就話以前物資唔算太豐富，所以食紅糖餅有補身補暖之效，不過呢位老北京就話依家要搵到正宗老北京糖餅已經有啲難度。

話時話，谷愛凌咁樣推廣傳統美食，都真係幾特別。