今年係前美國總統尼克遜訪華50周年紀念，响1972年2月21日，即50年前嘅今日，時任美國總統尼克遜抵達北京，開展咗訪華之旅，呢次咁具政治同歷史意義嘅出訪，自然有好多有趣嘅故事。

話說尼克遜响出訪北京幾日後，就去咗杭州。特別嘅係，尼克遜從北京飛去杭州，並唔係乘坐美國總統專機空軍一號，而係乘坐由中方安排嘅蘇聯製專機。當時正值冷戰時期，美國總統坐蘇聯製飛機絕對係一件極唔尋常嘅事。原來响尼克遜訪華之前，美國就有批官員先到北京同中方協商有關尼克遜訪華細節，當時美方代表就堅持美國總統要全程乘坐「空軍一號」，美方又要求運自己嘅總統專車，車上安排美方嘅特工保護總統。不過，中國代表就堅持交通工具一定要由中方安排，而且講明周恩來總理會陪同尼克遜坐同一架飛機從北京飛去杭州。結果係美方人員同尼克遜匯報，尼克遜亦同意中方有關安排。而當時中國擁有嘅飛機都係蘇聯製飛機，所以最後就出現咗美國總統乘坐蘇聯製客機嘅情況喇！

原圖嚟自網絡