近排香港就經歷緊一個冷鋒，唔少區域溫度更加跌到落個位數，對唔少港人嚟講都係相當凍嘅日子。仲未見到雪我哋可能就已經覺得凍，咁喺歷史上被唔少學者認為處於「小冰河時期」嘅明朝又有幾凍呢？今次阿史就同大家講一講啦！
其實如果史友們有留意明朝嘅歷史，會發現呢個朝代嘅寒災以及雹災比其他朝代都係異常地多，甚至仲佔咗明朝有記載嘅總災害數量嘅一半。呢兩種災害嘅出現亦都講明，其實當時明朝嘅氣候都係相當寒冷，甚至仲會影響埋糧食嘅供應，間接仲令到政局動盪。咁問題嚟喇，咁到底當時係有幾凍呢？
其實據後世學者研究，成個「小冰河時期」理應係由元朝初年到清朝末年，但明朝正正就係處於呢段時期中間，亦都係成個「小冰河時期」最寒冷嘅時期。今時今日嘅火爐城市南京，喺《明史·五行志》當中就被咁樣描述「冬奇寒，河凍數日不解」；而安徽地區更加出現「大雪數天，平地積三尺」；以往溫暖嘅南方更加「千里飄雪，境內積雪達數尺之厚」！
而呢啲極端嘅天氣就令到糧食大量減產、牲畜被大量凍死，繼而就係人口大減出現動亂，加劇了明朝滅亡，真係影響深遠！
原圖嚟自網絡