尼克遜訪華 美國幫中國裝衛星轉播設備？

五十年前時任美國總統尼克遜訪華，舉世矚目，呢個訪華之旅可以話係相當成功，為兩國關係正常化邁出重要一步。當然！作為兩個意識形態唔同嘅國家，存在分歧就在所難免。

上次提及過中美兩國代表經過一番協商，最後決定俾尼克遜乘坐嘅專機由北京去杭州。而响另一方面，美國總統訪華呢件大事，美方自然想美國全國人民見到，之但係當時中國就無衛星轉播設備。咁點解呢？美方就提出話會為中方提供美國衛星，仲會由美方免費幫助中國响北京、杭州、上海三處搭建轉播站。嘩！美國無償提供咁先進嘅設備，當時中國政府又點諗呢？最後周恩來總理就作咗個決定，衛星方面會以100萬美元向美國租借，整套衛星地面轉播器材就用10萬美金同美方購買。然後再租借美方使用，租金為60萬美元左右。件事操作咁複雜，係因為呢個關乎到非常嚴肅嘅主權原則。

而呢次衛星轉播對中國電視發展有好大影響，好似令中國的電視工作人員了解到美國先進衛星電視報道技術，仲有就係引發中國方面考慮引進國外先進電視技術，取代中國自主研發，最後就係打開咗中國電視界同外國電視業務嘅交往。