繼續同史友們介紹一啲我國可能存在過嘅奇珍異寶，之前阿史就為大家講過慈禧太后嘅翡翠西瓜，但向來鍾意收集寶物嘅慈禧又點止一件寶貝呢？今次就同大家講一講夜明珠啦！
相傳夜明珠其實就係同翡翠西瓜、蟈蟈白菜、玉石蓮花一樣，都成為慈禧死後嘅陪葬品，甚至仲被放入佢嘅屍身口中，但可惜最後就被孫殿英盜墓，強行撬開慈禧屍身嘅牙拎走咗。而據後來孫殿英描述，呢粒珠係「分開是兩塊，合攏就是一個圓球，分開透明無光，合攏時透出一道綠色寒光，夜間百步之內可照見頭髮。聽説這寶貝可使屍體不化，難怪慈禧的棺材劈開後，老佛爺像睡覺一樣」。
據學者王春雲博士估計，呢粒夜明珠其實就係一粒重達787克嘅金剛石原石，曾經係屬於印度帖木兒帝國、大英帝國、俄羅斯沙皇皇室，後來就先後落入阿富汗國王手中，後來就被當作貢品送咗畀清朝。據學者推測，原石就係經過切割後成為夜明珠，後來陪住慈禧太后入咗地宮，據講後來仲輾轉流落到宋美齡手，但最後下場係點就真係不得而知喇！

原圖嚟自網絡