上次阿史介紹咗陪住慈禧太后死後入地宮嘅夜明珠，後嚟輾轉流落到宋美齡手中。而整個過程就同民國時期一件震驚全國嘅事件有關，就係清東陵被洗劫事件。

呢件事發生响1928年，當時一位叫孫殿英嘅軍頭，向蔣介石投降之後就去到北平以東薊縣附近嘅清東陵，之後孫殿英以剿匪同軍事演習為名，用咗幾個月時間盜掘乾隆皇帝與慈禧太后陵墓。據溥儀响回憶錄提及過：「又傳說孫殿英給蔣介石新婚的夫人宋美齡送去了一批贓品，慈禧鳳冠上的珠子成了宋美齡鞋子上的飾物。」而慈禧鳳冠上嘅珠子，就係慈禧太后生前擁有最大嘅夜明珠。

不過呢啲都係溥儀聽返嚟，幾多成真幾多假就真係無人知，因為宋美齡生前無講過自己擁有夜明珠。但可能因為成件事太神秘，所以網上就有好多對夜明珠下落嘅講法，包括話宋美齡拎咗夜明珠去美國，送俾超級富豪洛克菲勒，要佢嘅家族支持國民政府云云。孰真孰假，真係無人知喇！

原圖嚟自網絡