繼續同史友們介紹世界各地嘅重要考古發現，尋日就同史友們講完約旦東部沙漠發現嘅新石器時代神廟遺址，而今次就要同史友們講一講有2000年歷史、位於加薩走廊嘅羅馬古墓！

喺歷史上加薩呢個地方由於地理位置優越，所以一直都係唔少古文明嘅貿易據點。既然有古文明國家貿易，自然就會有好多相當嘅歷史遺跡，所以世界各地嘅考古團隊都相當留意呢個地方。喺早幾日，考古團隊就喺加薩走廊北部海岸線挖出至少20座裝飾相當華麗嘅古墓，並且預計成個區域會有八十個貴族古墓出土。

考古團隊就打開咗其中一座古墓，當中就發現到骨骼遺骸以及一啲陶罐，再加上墳墓係從東到西分佈，所以理應係早期嘅羅馬墳墓而唔係後期嘅穆斯林墳墓。呢次發現被稱為係近10年來最重大考古發現，甚至當中仲有唔少亞歷山大圍城戰及蒙古西征遺跡，阿史真係相當期待有更多考古消息！

原圖嚟自網絡