之前介紹空城計個陣，就講話三國時期嘅諸葛亮就無關於佢施空城計嘅記載，其實諸葛亮嘅故事好多都係作出嚟，就好似赤壁之戰，依家小朋友講到嘅故事就同史籍記載就有啲出入。

最近阿史睇咗套歷史繪本，講關於三國嘅故事，當中就有火燒赤壁。講當日曹操率大軍南下，劉備聯同孫權大軍抗敵，仲响赤壁大敗曹軍，當中就話諸葛亮起七星壇，三日三夜後風向由北風轉吹東風，周瑜準備好嘅火船就乘東風嚟個火燒連環船。

呢個故事相當史友們睇《三國演義》都相當熟悉。咁諸葛亮係咪真係勁呢？响《三國志‧蜀書‧諸葛亮傳》中，的確有提及劉備軍同孫權軍聯合：「（孫）權大悅，即遣周瑜、程普、魯肅等水軍三萬，隨亮詣先主，並力拒曹公。」不過火燒曹軍嘅主角就唔係劉備軍，而係孫權軍。關於呢段歷史响《三國志‧吳書‧周瑜傳》中就有所記載：「瑜等在南岸。瑜部將黃蓋曰：『今寇衆我寡，難與持久。然觀操軍船艦首尾相接，可燒而走也。』乃取蒙衝鬬艦數十艘，實以薪草，膏油灌其中，裹以帷幕，上建牙旗，先書報曹公，欺以欲降。又豫備走舸，各繫大船後，因引次俱前。曹公軍吏士皆延頸觀望，指言蓋降。蓋放諸船，同時發火。時風盛猛，悉延燒岸上營落。頃之，煙炎張天，人馬燒溺死者甚衆，軍遂敗退，還保南郡。」即係話周瑜見曹操大軍啲船首尾相接，就諗到一把火燒晒佢，之後就叫黃蓋詐降，結果就火燒連環船喇！照咁睇，火燒赤壁似乎關周瑜事多過諸葛亮事喎....'

原圖：《三國演義》劇照