前個排香港凍得好緊要,又濕又凍令人相當難受。天氣咁凍自然要打個邊爐暖下成個人就最正。阿史响過年就喺網上訂咗個煙囪銅爐,無得去旅行就買個北方銅爐解咗愁,當自己去咗北京食涮羊肉。
如果史友們去過北京都可能會响當地食個涮羊肉,當地唔少舖頭都慣用圖中呢款煙囪火鍋,將啲炭放入煙囪裡面,啲火就保持住滾嘅狀態,咁就可以涮肉喇!呢種煙囪火鍋其實係由清代一位大官發明,佢就係和珅喇!話說响嘉慶新登基為帝時,搞咗場千叟宴,太上皇就請咗一大班九十幾歲老人家。不過,宮廷咁大,上菜慢啲啲餸會變凍,但老人家又唔能夠食凍嘢,於是佢就發明咗將銅爐度加個煙囪,食個陣煙囪內嘅熱炭令個爐熱辣辣,就係咁煙囪火鍋就慢慢成為咗京城美食。
所以話,和珅咁得乾隆歡心,一定有佢嘅獨特之處。
原圖嚟自網絡