關於秦始皇皇陵嘅一啲「黑科技」，阿史以往就同大家介紹過唔少，就好似有具備金屬記憶功能嘅青銅劍、塗上一層厚度約10微米「鉻鹽化合物」嘅古劍等等，呢啲技術都令考古團隊相當驚訝，甚至「鉻鹽氧化」呢個技術去到1937年先由德國發明，咁到底點解秦朝就已經有人識得用呢？呢啲謎團再加上一本古籍，就令唔少人認為秦始皇可能見過外星人！今次阿史就同大家講一講啦！

喺一本名為《拾遺記》嘅殘文史料結集當中，就紀錄咗秦始皇同「外星人」之間嘅往事。雖然呢本書係講述自上古伏羲以來奇聞異事集，但當中都係有唔少參考價值喺度！喺書中就提到，秦始皇嬴政好神仙之事，有一次就遇到嚟自「宛渠國」嘅人拜見，呢個人「乘螺旋舟而至。舟形似螺，沉行海底，而水不浸入，一名『論波舟』」，呢個形象就同大家認為嘅UFO極為相似。而且，呢個宛渠之民嘅形象更加係「長十丈，編鳥獸之毛以蔽形。始皇與之語及天地衫開之時，了如親睹」，真係相當誇張！唔單止咁，佢哋仲曾經向秦始皇展示過「黑科技」，以「狀如粟」嘅「燃石」就令到室內「輝映一堂」，甚至仲可以令河流「沸沫流於數十里」。而喺記載當中，呢啲「燃石」最後亦都落入秦皇手中。

而且，呢位「宛渠國」嘅人仲同秦始皇分享過自己穿越上古嘅故事，黃帝喺首山採銅鑄鼎都同佢有關，直頭令秦始皇驚呼神人，之不過故事係真定假就真係冇人知喇！

原圖嚟自網絡