提起明代開國功臣有徐達、李善長、常遇春等，自然就唔少得劉伯溫劉基，關於呢位歷史人物，後世流傳故事相當多，包括佢精通星象，能預知未來，中國著名預言書《燒餅歌》相傳就係佢所撰寫。不過今日阿史想討論另一個傳聞，就係劉伯溫嘅死同朱元璋有無關係。

劉基係浙江青田人。元至順間舉進士，博通經史，尤精象緯之學。朱元璋起事之後四出招兵買馬，去到處州時得知劉基、宋濂等人風評，於是禮聘而至，最後決定輔佐朱元璋。劉基成為朱元璋軍中一位重要參謀，參與討伐陳友諒、張士誠以及北伐元大都等軍事決策計劃。朱元璋稱帝之後，佢上奏制定軍衛法。由於佢肅正紀綱，所以就得罪咗唔少人，包括六公之首丞相李善長。後嚟佢亦向朱元璋請辭返鄉，最終獲賜還歸家鄉。但後嚟因病又被接返京城，但因為响京城愈醫愈差，最終都係離京返鄉，但返鄉後病情加重最終病死咗。

至於劉基嘅死，响《明史》就有載：「基在京病時，惟庸以醫來，飲其藥，有物積腹中如拳石。」民間故事就話係朱元璋要誅殺開國功臣，於是派胡惟庸毒死劉基。之不過，《明史》對呢件事就咁描寫：「其後中丞塗節首惟庸逆謀，並謂其毒基致死云。」咁似乎正史就將劉基被落毒同病情惡化入咗胡惟庸數。都合理嘅！因為劉基就同朱元璋講過，胡惟庸無料做丞相。

原圖：《朱元璋》劇照