之前提及過樓蘭古國改名為鄯善國並遷都伊循城，而原都城樓蘭古城就由漢朝派兵屯田。今次就想講多啲樓蘭同鄯善嘅關係。
漢朝時西域諸國之一，本名為樓蘭，漢昭帝時改名為鄯善，而呢個時期正正係樓蘭國一個轉捩點。因為响昭帝之前，樓蘭國時降匈奴，又時降漢皇朝，甚至向兩面稱臣。後嚟後匈奴侍子安歸立為樓蘭王，樓蘭國又偏向親匈奴。結果，漢廷就遣派咗傅介子出使樓蘭，仲响酒宴上殺咗安歸，改立尉屠耆為王。樓蘭王換咗人之後，就將首都由羅布泊西岸遷往南岸伊循城，仲改國名為鄯善，至於樓蘭舊都就成為漢廷一個都護府，成為軍事同交通要地。
如果讀過中史嘅史友，都應該記得班超出使西域時就去過鄯善國，仲發生咗「不入虎穴，焉得虎子」嘅刺匈奴使者嘅故事。今時今日，鄯善就係新疆吐魯番市所轄嘅一個縣，史友們可以响地圖上搵到呢個地方。
原圖嚟自網絡