和珅官場上真正對手 足足壓制佢三十年？

提起和珅呢個人物，相信唔少史友都受到早年一部電視劇《鐵齒銅牙紀曉嵐》影響，而認為佢官場上嘅最大對手就係和珅，之不過喺歷史上紀曉嵐比和珅大足二十幾年，雖然同朝為官，但實際上兩人嘅職務就差天共地。簡單啲嚟講，紀曉嵐就係一位學家負責做學術研究，而和珅就係真正嘅國家重臣。

咁到底歷史上和珅官場上又有冇對手呢？咁就當然有啦，而呢個人仲足足喺官場上壓足佢三十年，佢就係軍機大臣阿桂喇！喺歷史上阿桂係滿洲正藍旗人，平定過平定大小和卓之亂、參加征緬、出征金川事件等等，立咗唔少戰功，並且歷任伊犂將軍、兵部尚書、吏部尚書，官至武英殿大學士兼首席軍機大臣，真係可以話係身居高位，權傾朝野。

而當時和珅雖然係同阿桂同朝辦事，而朝中唔少官員都懼怕和珅，但阿桂就完全唔驚，甚至仲刻意同和珅保持距離。和珅深知阿桂嘅權勢身份，多次想巴結對方，但阿桂從來都唔肯私下見和珅一面，甚至仲會喺朝上對和珅大聲斥責，和珅就係咁畀阿桂壓制整整三十年。