世上有唔少面積巨大嘅文物遺址需要保育維護，現時慣常嘅手法都會將呢啲遺址圍封成保護區，再投入大量嘅人力物力恆常檢查。之不過，近日就有一樣新式嘅手法應用咗喺龐貝古城，阿史今次就同大家介紹下啦！
位於意大利那不勒斯嘅龐貝古城遺址，作為聯合國世界遺產名錄之一自然就有珍貴嘅價值，之不過要持續保護呢個佔地約66公頃嘅遺址真係唔係一件容易嘅事。近排龐貝古城遺址管理部門就引入咗一種「動物」協助檢查古城建築物結構安全，並協助巡邏，防止有賊人挖掘隧道，潛入古城偷取文物。
阿史所講嘅「動物」其實就係機械狗，呢種名為Spot嘅機械狗，由美國波士頓動力公司研發，配備360度攝錄機以及可處理、記錄資料嘅軟件。活動自如嘅機械狗可以喺狹小嘅空間移動，亦可以進行各類型探測，呢次亦都係首次有考古遺址應用呢種科技。
原圖嚟自網絡